論武功，俗世中不知邊個高，或者，做騷同途異路！狼英語言偽術了得，估唔到耍八段錦都可以耍得千變萬化，耍到似喪屍出動、似忘情亂舞，難怪可以耍破世界紀錄！
齊集833人破世界紀錄
話說振英哥噚日拍住佢老死發展局局長塵謬波，出席「建造業安全周2014零意外授旗典禮」。話晒係堂堂特首，搭多個咁多香港人都識得嘅局長畀面到場，點都要整色整水，搞番場大龍鳳振吓聲威嘅。呢兩兄弟有乜搞作？原來係要齊集833人，齊齊學習八段錦，「創造」最大規模氣功課世界紀錄喎。
狼英一出手，便知有沒有。第一、二招「雙手托天理三焦」、「左右開弓似射鵰」，可能佢未熱好身，耍到臉都紅埋，謬波就手腳唔協調，動作跟唔上大隊。
耍到第五招「搖頭擺尾去心火」，終於嚟料，但見狼英同謬波開始發功，一班人係台上頭岳岳、呆呆望，令人諗起狼英上台以來，淨係識得「搖頭擺尾親北京」。耍到第七招「攢拳怒目增氣力」，狼英紮行馬步，一雙「怒目」、「左右開弓」，無論係眼神同形體動作上，似乎都有十足意志對付泛民。
最後一招「兩手攀足固腎腰」，可謂狼英最耍家嘅招數，佢好自然咁雙手「上舉」，令人聯想到佢未上任，已向西環、向北京舉手投降，如果唔係，又點可以「固」到自己嘅官位？
狼英呢次耍八段錦，一招一式盡見雞手鴨腳，同佢帶領香港嘅本領，可以話係如出一轍。
李八方
MAILTO:[email protected]