「牛下女車神」李慧詩（Sarah）你係得嘅！收拾頭兩日喺爭先賽失金嘅心情，Sarah繼前日喺500米計時賽取得4連冠後，噚日喺哈薩克亞洲場地單車錦標賽最後一日賽事，再為香港爭光；佢喺女子凱林賽面對中國宿敵鍾天使同林俊紅，由初賽到決賽都發揮倫奧銅牌得主本色，最後力壓南韓選手Kim Wongyeong同鍾天使，成功衞冕。小師弟梁嘉儒同日亦喺男子青年組記分賽奪冠，令港隊5日賽事一共拎咗5金3銀4銅，位列獎牌榜第3位。
除Sarah包辦兩金外，師弟張敬樂早前亦勇奪兩金，包括記分賽及麥迪遜賽。噚日完成場地賽後，阿樂將自己喺今次亞錦賽獲得嘅2金1銀1銅共4面獎牌上載fb（小圖）。問佢覺唔覺得自己做到香港「1哥」，23歲嘅佢就好謙咁話：「其實我兩面金牌含金量唔高，唔覺得自己係『1哥』，等贏到奧運獎牌先再講啦。」阿樂之後仲要鬥亞錦賽公路賽，包括公路計時賽同個人公路賽，希望佢繼續有牌落袋啦！