人稱「肥馬」嘅前財經事務及庫務局局長馬時亨最近四周圍演講，上星期去完大學，噚日又幫畢馬威一個午宴擔任主講嘉賓。被追問早前佢建議老友梁錦松競選候任特首，梁點解否認，肥馬今次只係以一句：「佢鬧我！」簡單回應，睇來呢場「馬拉松」正式散場了。
唔講梁錦松，唔等於唔講普選。肥馬認為，香港推行普選好重要，有助提升政府認受性，分分鐘可以藉此擴闊稅基，「2017年普選雖然唔係靈丹妙藥，但選民可藉此質詢政府，點樣解決香港問題……廣泛討論邊個納稅，畀邊啲人」。
對於政府應該點樣收窄貧富差距，同時又避免社會分化，佢形容政府處理呢個問題相當高學問，佢就唔識答嘞。
肥馬身兼高鐵項目獨立調查委員會主席，噚日都有交代些少，指小組自5月9日開過三次會，到過工地實地考察，有信心如期喺7月完成報告，之後交畀港鐵（066）董事會。