呢期好興貼街招向藝人追數，繼張致恒同黃夏蕙之後，噚日又有讀者報料，話港台DJ周國豐同兩位哥哥欠澳門賭債，三兄弟借錢不還，玩失蹤兼賴皮云云。馮仁昭打電話畀周國豐了解，佢好淡定話：「呢個唔係第一日亂傳，我當中有一個哥哥欠人債，嗰間公司夾硬話我係擔保人，要我負責。」
同涉事二哥冇聯絡
周國豐強調自己好耐冇去澳門，事件雖然同二哥有關，但家人同二哥已經好耐冇聯絡，佢話：「我俾佢哋騷擾過好多次，佢哋打嚟公司恐嚇我，話要揚呢單嘢出去，又喺我微博同大哥facebook騷擾，影響我同家人安全，之前問過警察朋友，家人亦試過報警，我預咗佢哋會搵媒體，亦預咗佢哋會嚟公司搵我。」
對於再受滋擾，周國豐話考慮再報警：「不過唔知有冇用，其實家人同涉事哥哥好耐冇聯絡，我同大哥都係受害者，一人做事一人當，我預咗有呢啲報道，自己都唔想再糾纏，解釋一次就算，亦有同公司講咗，可能有呢啲新聞，呼籲佢哋搵番失蹤哥哥負責，唔好騷擾我哋。」
撰文：馮仁昭
