王維基終於公佈網購大計，有成50萬件貨，仲聲言要做「網上又一城」。驟耳聽，聲勢浩大呀可？但潑冷水都要講句：唔work囉！菲菲同好多香港人一樣，好支持佢開台，亦好想佢啲劇有機會面世。不過，今次佢條橋係，想睇劇要先購物換代幣，真係好難睇好。王維基今次用咁創新嘅營銷手法，背後個假設可以係，佢相信佢啲劇真係好得，得到會吸引大量網民為煲劇而消費。
作為消費者，一部劇再好睇，當好睇到好似「星星」咁，如果當時有人叫你，想睇落去的請買條廁紙，你估你仲睇唔睇？菲菲一定唔會。更何況係，再好嘅trailer，套劇都可以爛。同埋而家個問題，唔係畀唔畀得起錢去消費嘅問題，而係條氣唔順。好哋哋想睇部劇，做咩要迫我買一啲我原本唔想買嘅嘢？菲菲寧願一件事還一件事，我想睇劇，真金白銀畀錢；到我真係想買廁紙時，我先再畀廁紙錢，唔好將兩件風馬牛不相及的東西捆綁銷售。當然，王維基背後理念，又可能係佢個平台產品本身已經好吸引，至於啲劇集係送嘅。如果係咁，所謂吸引，離不開夠平！講真，香港太方便了，如果鬥平的話，你平到幾多先？假如啲貨同香港零售商賣嘅一樣，除非大手入貨，否則有幾多人會為少少錢，等你送貨上門？王維基係一個聰明人，冇理由上述嘅嘢佢會諗唔到，或者遲下佢會公佈條終極必勝大橋啩。
Fifi
本欄逢周二、四刊出