研究中國多年，不時到大陸研究國情嘅專家L，呢日去大學演講完畢，出席晚飯飯局，對左丁山講：「你在專欄講向內地買電，有反對之意，我睇完你寫嘅理據之後，發覺你冇乜講到買電嘅政治性質，有啲偏差噃！」
講內地政治，左丁山當然唔係專家L嗰皮，但根據數字，以事論事，將來如向內地買電（佔香港三成用電量），供應嘅可靠性的確令人憂慮，譬如中電在五月二十一日向環境局提交意見書，就指南方電網去年每名客戶嘅停電時間達138分鐘，而中電每名客戶嘅意外停電時間係平均2.3分鐘，相差60倍，香港用電客戶點能夠唔重視供電可靠性？東鐵今年因本身之電纜出事或其他意外而導致停駛起碼兩次，俾市民鬧到暈，如果中電停供電力138分鐘嘅話，後果不堪想像。
香港這兩個月來，有過黑雨，不時有黃雨、暴雨、雷暴警告，港人已習以為常，但到目前為止，香港停過電未？答案係零次。一個星期有三日在深圳工作嘅工廠老闆F要搵左丁山飲下午茶傾偈，講到電力供應，佢就吐苦水，引述內地傳媒報導講，5月11日，因有雷暴及強降雨，影響所及，深圳電網220千伏麗騰甲乙線N7塔塔腳發生嚴重塌方、深圳電網有77條次10千伏線路停電，截至5月12日，廣東電網500伏線路跳閘3條，220千伏線路跳閘4條……停電分區2410個，客戶24.8萬戶，主要集中在深圳、東莞、江門、陽江、中山、珠海與河源，深圳受災較為嚴重。講得咁詳細，左丁山問佢喺邊度睇到，數字從何處來？老闆F打電話返深圳叫夥計再查，哦，查到嘞，就係5月14號嘅「南方電網報」，南方電網都幾誠實透明，冇隱瞞事實，所以老闆F話：「香港向南方電網買電？叫黃錦星上深圳感受吓停電先啦！」騎騎，身在福中不知福，乃人之常情，到真係停電臨頭之時，大家咪亂作一團，互相指駡，鬧上立法會，要求問責囉！回頭講番專家L，佢當晚就話左丁山講事實冇鬼用，大勢就係電力係戰略性企業，中央需要逐步控制，供電可靠性與電費、環保不在考慮之列，大前提係中央戰略，特區政府必須遵從，逐步執行！