一年一度嘅渣打冠軍暨遮打盃，噚日喺沙田馬場舉行，渣打認股證銷售副董事、人稱「小飛俠」嘅林燕玲，同埋認股證銷售董事翁世權，請埋一班股評人入場考眼光、試運氣。其中，「沈大師」沈振盈食白果，佢話場遮打盃自己串咗5隻，就係穿漏跑第3嗰隻「加州萬里」，所以全日冇乜輸贏。
洪丕正貼唔中馬
剛升任渣打大中華區行政總裁嘅洪丕正（Ben）由2011起連續3年貼中單T，但可能因為公事越來越忙，佢對馬仔嘅靈感冇咁好，又未能落足心機刨馬，今年貼唔到靚馬。
噚日第8場遮打盃賽事，阿Ben貼咗1號「威爾頓」、3號「多名利」同埋7號「格哥兒」，結果分別跑第5、7同埋4，即係連位置Q都唔中，失威咗少少。
