立法會審議財政預算撥款條例草案，長毛向主席曾鈺成提問，詢問出席會議負責解釋該支出項目官員係乜水，曾鈺成慌忙翻閱枱面文件，咿咿哦哦一輪都噏唔出呢位問責高官名字，最終尷尬地叫佢自我介紹，場面爆笑、荒謬兼而有之，媲美Dr TreeGun暴喝港鐵CEO洋人韋達誠之港式爆Seed英文。
呢位連資深政客、立法會主席都認唔出之問責官員叫梁敬國，官拜商務及經濟發展局副局長，入官場前是建造業工人註冊處總監，全無政治工作、智庫或傳媒等相關工作經驗，在政圈知名度係零。特區出現一個個無厘頭人士出任高官問責團隊，錯不在梁敬國，錯在特區毫無政治規範可言嘅政治任命體制，不少手握大權嘅官員好似由石頭爆出來，未當官時外間對佢哋一無所知。好似吳克儉黃錦星兩位局長，連稍重要嘅法定機構諮詢組織都未做過，憑甚麼可以做局長，而且有令人信服之權威？兩年下來，公職表現有目共睹，吳克儉以外訪作本業，局內政務官根本就唔放佢在眼內，至於黃錦星，又憑甚麼可以爭取政黨、地區勢力支持一堆一爐？
問責官員本業是推動施政，為政策護航造勢，爭取公眾、政黨、輿論支持，要勝任工作，必須要有人脈及政策論述能力，呢瓣先至係專業政客嘅專業技能，而非對政策專業認知，因為專業政策是公務員負責，呢個分工應該好清楚。梁敬國呢類副局長，無可能勝任專業政客工作，自然唔會俾公眾認識。好簡單道理，當成批副局長都冇乜做民意、議會及輿論工作，相信到佢哋2017年離職時，曾鈺成都係冇辦法噏得出名字。𠵱家唔係叫公眾認得出，而係連政客圈子內都認唔出先至荒謬！
就算跑議會及政府新聞的記者，有邊個會認得楊潤雄、陳肇始、馬紹祥？又知否佢哋喺邊個局當副局長？佢哋就算去立法會事務委員會發言，份講稿由AO草擬好，戰戰兢兢口窒窒讀完份稿，成班政務官先至鬆一口氣，如釋重負。局內嘅期望好低，係只要佢哋唔好噏錯嘢，邊敢期望副局長們有能力爭取議會、傳媒或建制派支持者站出來。
問責制操作所以荒腔走板，原因係背後欠缺專業政治邏輯，人事任命方式業餘及充滿任意性，冇一套公認的規範，有時甚至出現局長不如副局、副局不如政助之局面。呢種任意性令香港寶貴之政治人才培育，白白浪費在一棚對政治一無所知，也從未視政治為志業嘅「港式專業精英」手上。幾年後，一棚問責官員離開政府，消失於政圈之中，同一時間，又有另一批如梁敬國、馬紹祥一樣的業餘政客加入，周而復始，結果香港問責制由老董開始實行十幾年，最終，政治人才依然匱乏，管治水平依然低落，然後又繼續以欠缺政治人才去解釋管治問題。
港人治港，如狗追逐自己尾巴，不斷原地轉圈！
添馬男