做政治人物，做到冇乜人識，真係唔容易。返咗工半年嘅商務及經濟發展局副局長梁敬國，連立法會主席曾鈺成都唔知佢係邊個，辳爆程度有近十粒星。但係講到冇人識，梁班子內仲大有人在呀！
首先講吓梁敬國先，自從曾鈺成一問，呢位「有頭髮版嘅黃錦星」副局長因而聲名大噪，噚日佢出席民建聯活動時，發言時向街坊自嘲，「你哋識我嘛？」梁敬國話，曾鈺成認佢唔出係「小事一樁，何足掛齒？」件事冇令佢唔開心，加上呢件事反而令更多人認識佢㖭，真係「大方」到呢！不過曾鈺成就回應話，希望官員唔係因為佢認唔出而被人認識，官員知名度應該係靠多啲接觸市民。
月𢭃十萬 貢獻欠奉
見報率「尾二」嘅64歲劉怡翔，係財經事務及庫務局嘅副局長，做過政務官兼按揭證券公司前總裁，為官咁多年，仍然冇乜知名度，實在令人佩服。曝光包尾嘅係劏房波嘅副局長馬紹祥，佢上司醜聞多，難怪要低調，本身係工程師嘅佢，未做副局前係於工程顧問公司AECOM工作，曾參與高鐵總站設計，高鐵搞到一鑊粥，佢都有責任㗎。
多位副局冇人識，但政治助理仲慘。趙必立、劉富生、胡韻珊，呢三位政治助理，每人月𢭃10萬，但你哋知唔知佢哋喺邊個政策局返工？原來佢哋分別係財庫局、保安局、運輸及房屋局嘅政助。趙必立之前做過高盛證券、花旗證券、貝爾斯登；劉富生係退休助理警務處長，胡韻珊係監警會前助理秘書長。三人今年嘅見報率，加埋唔夠5次，有乜貢獻？咁低調，邊個知！
李八方
MAILTO:[email protected]