周日喺哈薩克舉行嘅亞洲場地單車錦標賽，李慧詩（左）喺女子500米計時賽，以34秒063擊敗南韓同馬來西亞嘅對手，奪得今屆賽事個人首金之外，仲連續贏咗呢個項目4年，咁好成績，對佢今日爭取衞冕凱林賽好有幫助。除李慧詩外，已有兩金在手嘅張敬樂，同日喺男子全能賽再攞多面銅牌，另一銅牌得主就係胡樂雋，佢喺1公里計時賽造出1分03秒724。