出道39年Hello Kitty，俘虜世界各地粉絲，仲橫跨多個年齡組別。鍾愛Hello Kitty嘅粉絲甚少「轉會」，仲經常掃盡吉蒂貓嘅主題產品。無論係到7仔儲印花換鎖匙扣，或者餐餐食老麥換限量吉蒂貓公仔等，均不乏捧場客。
由於Hello Kitty喺市場推廣屢戰屢勝，「吉蒂媽媽」Sanrio決定變陣，由授權專利轉攻零售，未知會否搞到老貓燒鬚?
擁有吉蒂貓肖像權嘅Sanrio策略大轉向，上星期四扑槌落實承擔行銷同銷售，喺零售範疇開展「核心業務」。換言之，以後吉蒂貓嘅廣告、文具、禮品卡及銷售渠道，均由Sanrio包辦。消息公佈後，Sanrio股價喺日本股市一瀉千里，見19年來最大跌幅，估計市值單日蒸發35億元。Sanrio股價反映市場唔buy策略急轉彎，唔明點解Sanrio要跟原本穩賺嘅生意講拜拜。
彭博資料顯示，Sanrio經營利潤勁升超過一倍，全靠授權專利所賜。公司以往同其他廠商簽授權協議，將銷售產品風險卸走。
今次Sanrio將核心業務定點位於零售，落手落腳搞推廣、製作廣告兼搵舖位等，承受風險大大提高，蝕錢機會亦增加。
有大行亦唔睇好Sanrio，高盛調低公司明年財年營運盈利預測7%。吉蒂貓今次變陣真係要自求多福。
C+B
本欄逢周一刊出