唔知大家上星期六晚等歐聯大戰之前做啲咩燒時間?我求大俠就選擇咗睇英冠升班附加賽決賽，打比郡對昆士柏流浪（QPR）。估唔到場波都幾精采，但係最後踢少個嘅QPR喺90分鐘憑前鋒森莫亞建功絕殺對手，只係用咗1季時間就成功重返英超，仲為球會帶嚟1.34億鎊（約17億港元）嘅收入。
執17億只怕重罰
QPR來季成功重返英超，但就要面對另一個問題，就係球會因為收支失衡，負債累累，違反咗歐洲足協嘅財政公平規則，被判罰款5,000萬鎊（約6.5億港元），球會主席費南迪斯喺贏波後就表示一定會上訴。掃興嘅嘢就唔講咁多住，驚險攞到升班資格就點都慶祝咗先啦；隊中嘅「壞孩子」祖爾巴頓就喺賽後慶祝嗰陣偷襲費南迪斯，同佢玩騎膊馬，仲差啲跌咗呢位馬來西亞籍嘅主席落嚟。
睇中5大英超球星
慶祝完就要諗增兵喇，畢竟英冠嘅實力同英超比始終有啲距離嘛。QPR傳出嘅目標人物全部都係啱啱同球會合約完結嘅球員，不過唔好以為呢堆球員都係賣剩蔗，其實都有唔少球星。而QPR睇中嘅分別係里奧費迪南、林柏特、巴利、艾殊利高爾同埋祖高爾。加上球隊有唔少都有英超經驗，好似羅拔格連、胡禮菲臘斯同決賽奠定勝局嘅森莫亞等，配合經驗豐富嘅領隊哈利列納，呢個陣容睇牌面，都有機會可以喺下季英超立足。
我求大俠再睇番個自由身球員名單，先發覺唔只上面嗰幾位球員，所以我執咗個11人名單，如果佢哋組隊波下游球隊都可以諗吓呢班球員。
