王菲舊年同李亞鵬離婚，當時佢哋就協議會一齊照顧囡囡李嫣。聽日嫣兒就8歲生日喇，前日佢兩個兌現承諾，一齊為愛女預祝8歲生日，而佢哋嘅朋友仲將啲相放上微博。生日會現場掛咗唔少氣球，李嫣請咗好多朋友仔出席生日會外，王菲同李亞鵬亦有邀請一啲朋友為嫣兒慶祝，大人細路打成一片。身為主人家嘅李亞鵬，仲同班小朋友大玩捉迷藏，王菲就同其他家長企喺旁邊，攞住啦啦球，同班小朋友打氣，玩得不知幾開心。
一齊揀蛋糕
玩完遊戲，就到咗切生日蛋糕喇，李亞鵬同王菲為嫣兒準備咗一個「angry bird」嘅生日蛋糕，上面寫住「生日快樂 天天快樂 Happy Birthday」，李嫣切蛋糕後，仲錫咗爸爸一啖。王菲仲同李亞鵬一齊為嫣兒揀蛋糕，更不避嫌咁企埋一齊食生日蛋糕同合照㖭！
撰文：馮仁昭