上星期本欄話騰訊（700，臨時編號2988）無得跌，大市亦將見23000，估唔到目標轉眼已達，有幸跟市場先生同步，意猶未盡，希望將所思所想與大家分享，再藉此推敲未來的一步。
早已講過，熱炒股死於3月14日內地叫停新經濟，我信係最高管理層平衡新舊經濟的王道補藥，可惜如意算盤被東歐的克里米亞所打亂，一切變奏從這處開始。3月17日克里米亞公投，93%的選民願意歸入俄羅斯聯邦，俄羅斯為了這軍事黑海心臟，不惜面對西方制裁，而中國偏偏是聯合國安理會十五國就反對克里米亞公投的唯一棄權國，故這個朋友暫時是交定了。
印度緬甸要多望幾眼
中俄眉來眼去之後，美國開腔支持日本解禁集體自衞權，再有菲律賓扣押中國漁船；越南罕見地出現大規模排華，再近期一點，泰國親中的「他信」親屬政權被推翻，從上圖所見，突然很多中國周邊小國齊齊對中國打X，看似巧合，但時間上未免太巧合了，陰謀論一點看，美國見中俄靠近，自然要做的是孤立俄羅斯這個盟友，更有甚者，令人髮指的疆獨恐怖活動，也被指是有大國撐腰，世界維吾爾代表大會每年接受美國國會資助，而一些流亡海外的維吾爾組織宣稱成立的「突厥斯坦共和國」總部設在華盛頓，這種種都難免令人有遐想，總之內憂外患都入了美國數。
「喂！大哥，我炒股票啫，睇增長、PE、RSI就得啦？這些有冇用㗎？」微觀當然要睇，但國際形勢影響國策，更不能不察，唔係我多心眼，而係有些地區概念股真的突然受到照顧，大家睇睇我四月力推的俄鋁（486）過去三年從14元左右，跌到2元，突然從底部升了七成，是否鋁價上升呢？非也，美鋁（Alcoa）、中鋁（2600）都無點升，唯獨是俄鋁，而俄鋁爆升之時，是3月17日，正正是公投之時。唔信邪？小弟另一力推的新疆新鑫（3833）又是升了七成，亦是從這段日子升上來的，邪唔邪？鎳價上升係原因，但新疆因素亦並非無可能。捉到條路，我再推算六月初中共必須維穩，故此，中國網上最大的社交平台騰訊亦應得到甜頭，而一直被打的貪腐集團亦會在國難當前，槍口一致對外之下，暫時得以喘息，所以大市唔會跌，應會反彈至23000幾以上先，而俄國如此需要中國這朋友，又點會唔簽天然氣協議，所以鋼管股應有可為，結果傾了十年的談判，巧合地在今月突然傾掂，所以你話睇通條路緊唔緊要。
咁下一步呢？我嘅方法有兩種：（一）見到某些股票出現訊號，立刻聯想同這形勢有關否？（二）先篩選一些地區概念股，一有異動，上車。環繞中國的幾片亦敵亦友的大地，亦將會成為籠絡對象，外蒙古、哈薩克、印度及緬甸都要多看幾眼，除了印度因大選上升了許多，可候調整買ETF外，有些本地或新加坡上市公司在這些區域有業務來往，一些近日仲已升了八九成。
邊幾隻？自己做一做功課喇，唔好信黃子華話睇睇報紙就當做股票功課先得㗎！
張士佳
筆者持有騰訊認沽期權短倉，俄侶（486）及新疆新鑫（3833）已平倉