【本報訊】一日跑三場學不同樂器的繁忙小學生、要求孩子五歲前考到四級鋼琴的非常媽媽……為教育中心編寫行事曆軟件的另類IT人何光熹，遇過不少怪獸家長。「學樂器變成基本技能，個個都話要贏在起跑線」。帶着疑問，他創辦義教音樂團體，協辦下月舉行的另類「換物」音樂會，鼓勵觀眾帶舊琴譜入場，捐贈給愛音樂的基層孩子，讓音樂的種子，遍地開花。
記者：呂麗嬋
中學讀英華，會考高考成績超班，考獲心儀學科，在中大讀訊息工程，一畢業就在跨國企業任職，25歲便創業的何光熹，現時是一間資訊科技公司的老闆。小半生一帆風順，34歲的他，從來自信爆棚，「我嘅夢想，係希望40歲前搵到一嚿錢，然後做義務工作」。超級富豪蓋茨是他的偶像，努力搵錢然後行善，這種人生次序，曾幾何時，他以為理所當然。
受怪獸家長啟發
「直至幾年前，我嘅好朋友外遊回港，突然手腳無力，連講嘢都有問題……」全身檢查，找不着病因，對從來自信可掌握一切的他，像一記重擊，「有好多嘢，就算你計劃幾周詳都無用」。反思人生的先後次序，他問自己：「既然想幫人，點解要等搵夠先可以做？」坐言起行，由公餘為基層孩子補習，到創立「WeWah音樂家」，教孩子學習音樂，他笑言，是怪獸家長啟發了他。
「我嘅公司主要為教育中心編寫行事曆，每次見到啲學生密密麻麻嘅時間表，我就諗，基層小童無錢學咁多嘢，咪好蝕底？」帶着能量飲品參加補習班的繁忙小學生，還有要求五歲前考到四級鋼琴的非常媽媽，令他迷茫，贏在起跑線的遊戲規則，誰敢不從？
「今時今日，學鋼琴好似變咗一種技能，試過有個家長，叫間教育中心幫佢個女五歲前考到四級，仲要唔止一個有咁嘅要求……」
不教樂理，只彈死一隻考試歌。過到海，便是神仙。「越多才藝證書，考中小學更有優勢」。小學便學琴的何光熹，也是如此成長。他直言，基層的孩子注定「輸在起跑線」。兩年多前的暑假，他辦了首個義教鋼琴的暑期班，學生大部份都領取綜援，也有來自單親家庭，甚至更複雜的家庭背景。
下月辦「換物」音樂會
透過暑期班，他甄別出有潛質的孩子，與登記了的義務鋼琴老師配對，至今已累積了約50名學生，而願意定期抽空教琴的義務音樂老師，也有十多人。「睇到佢哋好自信咁喺琴前演奏，同佢哋一齊成長，再辛苦都值得」。不單止為考取更高級別而學琴，會為彈到一首感動的歌，歡喜若狂。
指尖，在黑白鍵上飛馳，原來可以自信又快樂，「下月嘅一換一概念音樂會，我會讓學生登上舞台，參與演出」。因教之名，他重拾了冷卻多年的音樂熱情，「我同好多人一樣，細個喺父母要求下學琴，考到八級就停咗，至多偶爾做吓教會司琴，因為佢哋，我重新愛上彈琴」。義教貧童，換回快樂音樂，人生，的確始料不及。