新亞師兄張建雄（筆名張總）在東京上船環遊世界之前，着人寄來他的最新著作：「讀史觀世」（商務印書館2014年4月一版）。張兄喺法國里昂銀行之時，已有專欄及出版飲食、旅遊之書，退休隱居上海之後，有更多時間與太座周圍度假旅遊讀書，呢個階段嘅著作大多是三十年銀行風雲、讀史觀世界一類。今次呢本「讀史觀世」，左丁山收到之後，第一時間由頭翻到尾，還未有時間仔細閱讀，得到嘅印象係張兄以錢穆與南懷瑾嘅歷史觀點串通世情，縱橫三百年古今中外，暢論21世紀中美日歐印度及亞洲四小龍之國情與未來發展，要慢慢消化吓先。
我地一代嘅新亞學生，必修中國通史，肥佬唔可以畢業，還有大一國文，大二國文，選讀經典古文，又以「孟子」一書為必讀本，在新亞讀中國通史，唔讀錢穆之「國史大綱」、「中國歷代政治得失」等書，幾難攞到高分數，不過坦白講，當年讀通史主要係求分數，唔好肥咗就畢唔到業啫，但入到社會做事多年之後重讀「國史大綱」，就另外有一番體會。張兄話：「在銀海翻滾了三十年之後，再重讀錢穆的『國史大綱』、『人生十論』、『世界局勢與中國文化』等書，終於明白了西方剛性歷史和中國柔性歷史的分別，『歷史動力在人心』是甚麼一回事。」
今日香港教育課程之中，中國歷史已不受重視，考文憑試嘅六七萬學生之中，選考中史嘅，大概只有十分一多啲，一位書商曾向左丁山吐苦水：「出版中國歷史教科書苦過DD，市場萎縮到得人驚！」就因為香港學生多數唔識歷史，視野與思維未免唔夠深度。張兄話錢穆有一篇文章講如何教歷史（〈論中國歷史教學問題〉1957），講得好透徹，今天仍站穩崗位嘅「歷史老師」，不妨搜尋出嚟讀一讀，（左丁山未見過）。張兄引述錢穆講，要令十幾歲學生懂事（唐宋白話謂之曉事），冇歷史實例，好難懂，首先要教學生知道何謂成敗得失，賢奸忠佞，以歷史人物故事說明之，然後教時代世運，知道如何謂盛衰治亂及其根由，學生現處於甚麼時代，令學生從學習中接觸到人生之大局面，咁就有興趣追讀歷史嘞。張建雄呢本書已在書局有售，有興趣嘅讀者，特別係中年賓架，不妨買一本細讀。