一眾名宿老將早已被遺忘，現時效力港甲橫濱FC的羅振邦，連父親羅灶石是有名的守門員都不甚清楚。事關振邦是80後，出生時羅灶石剛退下火線做生意，聽到父親的威水史，「我上網搜尋佢啲資料都搵唔到。」眼角瞄瞄身旁捧着啤酒肚的父親，笑道：「你話佢彈跳力好我信，好彩媽咪有收藏佢舊時的相片。」相中只見鋼條型的羅灶石，從右邊飛撲，雙腳屈曲彈起，接住飛向龍門頂的球，振邦自言看着相片會慢慢思考箇中技術竅門。
從小到大振邦就活在父親的嘮叨下，諸多批評，像球一樣被左踢右踢。這一代球員訓練體能多於球技，他透露很多秘技都是從父親的法寶袋裏學懂，「佢教我點搓實啲波，話我知球場上點樣千變萬化。」在球場上，振邦重踏父親當年的足印。羅父說：「我教個仔，一上到場就要專注，就要𥄫實個波直至完場。有時佢輸波返屋企喊，我話佢錯處太多，體力同信心都不足。」振邦回應：「佢話我上到場唔夠精神，我辯駁唔係啊，我好精神喎。」長大了，他逐漸明白這份專注就是鬥志。羅母接口道：「佢19歲入咗甲組，我都唔想佢踢波，勸佢專心讀書。佢平時斯斯文文，都唔同人搶波，我到今日都覺得佢唔適合做足球員。」當年就連父親都對他表示失望，勸其轉行。幸得哥哥開口支持，「佢話條路係自己揀，會盡力做好，梗係支持佢啦！」後來叔叔羅偉志帶他加盟星島，03年還入選香港足球代表隊。羅灶石讚揚兒子：「他最威水一次就係一場甲組聯賽三次頭槌入球，好勁！」要得到嚴父這句讚賞真的不容易，平日羅父見到乖仔進球，全場球迷齊聲喝采，他依然雷打不動。
近射單刀 我都救到
然而，羅爸爸仍然堅持：「振邦冇我咁堅毅，我個年代唔同，好艱苦。我都希望佢將來可以學到我八成。」羅灶石1965年加入南華體育會。當年比羅灶石更耀眼的球員大有人在，羅太說：「佢唔係我偶像嚟㗎，我鍾意姚卓然。」後來羅太在南華會工作，想不到，身材矮小的羅生竟然合她眼緣，「佢知道自己唔高。我做嘢時見佢喺球場不斷跳欄，又打籃球，練彈跳力。」羅生在家裏就常將自己威水史掛在嘴邊：「我很有自信，希望對方快點射球。我好多場都表現好好，對精工，不論近射或單刀，我都能救到。」羅灶石努力三年終於薄有名氣，天天收音機都會聽到羅灶石響噹噹的大名。他拍拍兒子的肩膀，說：「其實振邦有好多場比賽表現都好好，只係現在傳媒唔多報道本地足球。想當年本地球賽，佔一大版報道。」
從小時候嚷着跟叔叔入球員更衣室開始，到現於橫濱FC當助教，羅振邦自言要比學員付出多百分之二百的努力。羅太道：「我問佢你仲鍾唔鍾意踢波，佢話仲鍾意踢！」雖然振邦自覺球技不及父親和叔叔，讀書不及當工程師的大哥，但他一生就是盯實足球跑。羅灶石：「我叫佢進修普通話同英文，33歲人要為將來打算。」羅太靜悄悄地說：「幾年前個仔去菲律賓讀大學，戴四方帽，個老竇不知幾開心。」談起振邦的成就，父親羅灶石的表情，明明從心底裏笑出來，又要收斂幾分，「不過，佢入球同戴四方帽，我都係覺得佢入球開心啲。」
