出埠工作難忘的事特別多，不過有時某啲秘密經歷當時唔方便講，過咗一排又唔記得講，所以不如趁出發去森巴之前，一次過講嘞。
1996年奧運會去咗阿特蘭大，當時工作係每日將幾百頁資料fax返公司，響IBC一路睇珊珊嘅風帆賽事，一路睇住有冇食紙，其實幾「得意」。本來有另一位同事輪流做，但佢成日去睇啲我入唔到場嘅賽事，後來先知佢叻到響個證上面加咗幾個數字，響當年人肉check證嘅日子暢通無阻。
2000年去咗荷蘭同比利時，自己一個坐喺球場講波，當年戲碼4強係法國對葡萄牙、荷蘭對意大利嘅經典，但我最透唔到氣係第1場4強嘅上半場，因為講咗5分鐘之後，香港同事響耳筒話我知：「由於技術問題，你把聲快過畫面3秒鐘，你可唔可以人肉delay番些少呀？」吓，呢個要求簡單得嚟又有啲唔容易，結果將隻眼同個嘴分開運作咗半場，好在下半場正常番，而我就成為咗45分鐘嘅「先知」。
2002日韓世界盃，連踩好多日嘅採訪之後，去到最後一晚嘅聚餐，唔知係俾人煽動定自己太high，連續飲咗10杯燒酒，然後發現自己英文越講越好之際就不省人事，深夜擘大眼就已經瞓咗響酒店床，條褲濕晒，身邊一個人都冇。呢個環境我好冷靜，先打電話同老婆「報警」：「頭先我俾人灌醉咗，之後有人話你知我做過啲乜，都唔關我事。」
2009年全運會，同國內電視台分享辦公室，有次見到黃金寶嬲爆爆唔肯接受國內電視台訪問，好奇之下同聲同氣咁安慰吓佢，「點解唔睬人哋訪問呀？」「喂，佢問我點睇香港𠵱家好興嘅𡃁模呀，點答呀！」
2010年南非世界盃，冇飛入場睇決賽，張張波飛幾萬蚊，諗住實冇得睇，點不知因為高Ling同當地一個香港老闆相熟，結果老闆將佢自己僅有嘅兩張飛送咗畀我哋入場，先有得響現場報道。不過大家唔好誤會，嗰位老闆係女士嚟嘅。
KEYMAN
now TV主持