萬眾矚目嘅2013/14歐聯决賽，今日在里斯本舉行，時間係晚上七時四十五分，即係香港時間明日凌晨二時四十五分，夜係夜啲，好彩聽日係禮拜日，唔駛返工，到時左丁山必然坐在電視機前睇波啦。話時話，在其他地方，一場咁重要嘅足球決賽，而且係歐洲足球季最後一場波，一定係在日間舉行嘅啦，點解要在夜晚作賽？恐怕最大理由係歐聯足球時間表一向係咁，冇得改，二來西班牙人係夜鬼，夜夜都唔瞓，睇夜波係佢地文化生活一部份，睇日波反為唔慣㖭。
呢場決賽係歷史上第一次由同市兩隊對決，由馬德里市嘅皇家馬德里對馬德里體育會，即是將「馬德里打吡大戰」搬去葡萄牙首都舉行，見證西甲嘅水準。今季稱雄歐洲，另一支西甲球隊西維爾已奪得歐霸盃冠軍，西甲球隊肯定獨霸歐洲，英超德甲俯首稱臣。
皇馬素來係歐聯之皇，自1956年起至今，已得到9次歐聯冠軍（舊時叫做歐洲冠軍球會盃），而且入過13次決賽，對上一次攞冠軍係2002年，而教練安察洛堤亦以前有三次歐聯決賽經歷，故此整隊皇馬嘅歐聯決賽經驗豐富到極，今次在準決賽贏咗拜仁慕尼黑之後，球會高層以「十全武功」（Decima英文譯作perfect ten），第十次奪標為最大目標，在西甲最後三場放軟手腳，就係怕咗陣中主將為爭奪西甲冠軍而受傷，要留力吖嘛。
相反，馬德里體育會係同市嘅窮細佬，長期俾豪門球會皇馬睇低，馬德里嘅有頭有面市民，幾乎盡是皇馬粉絲，馬體會埋頭苦幹培訓新人，但因為五行缺水，每每將陣中最值錢嘅前鋒賣走嚟搵現金，譬如過去幾年就賣走托利斯、阿古路、花高呢三位頂尖鋒將，來季又話要賣哥斯達，真係幾淒涼。今日呢場決戰直情係貧富球會之爭，貴介公子大戰工人階級，邊隊會贏呢？馬體會今季對巴塞隆拿未輸過，搶到18年來第一次西甲冠軍，對皇馬一啲都唔會驚，喺舊主將西蒙尼教導下，馬體會全隊士氣如虹，可以打全場緊逼，十上十落，似一部高速運行嘅機器，對方好難射破佢嘅龍門，連美斯都冇晒符。不過皇馬有BBC三件高速快馬，毋須短傳橫傳就可直插馬體會心臟，擊破防線，呢場波應該好好睇，大有可能會踢到加時憑12碼分勝負，有運者勝。