現年60歲的八両金（原名葉競生）的老婆八両菜（何顓彤）99年走佬，撇下八両金獨力照顧當年只得4歲的「八両仔」葉小霆。3年前八両菜主動跟囝囝相認，一家不時聚會，原以為八両金和前妻冰釋前嫌，但八両菜昨日主動聯絡記者爆大鑊，不但數臭前夫，還公開當年婚變及離家出走的內情。
「對我打打鬧鬧」
八両菜昨日在電話中說：「99年5月31日我離開，你哋查吓當時八両金去咗邊，佢返咗內地媾女，我聯絡咗佢大半個月，佢都唔肯返嚟。」八両菜表示試過找小三晦氣，但八両金仍然繼續搞婚外情。八両菜當年拋夫棄子，被指因為八両金受97金融風暴影響經濟陷困境，八両菜不肯捱窮離開，她昨聲淚俱下激動否認：「婚後我哋開過間地產舖，即使賺錢，佢每個月都係畀5,000蚊我，佢唔會再畀家用，我要養家同囝囝，後期舖頭冇咗，我要出去打工賺錢返嚟，冇拎錢返嚟，佢就對我打打鬧鬧。佢冇錢時成日碌爆我張卡，由我去找數。」
八両菜不屑前夫經常利用囝囝結識富商𢱑撈，八両菜說：「我走咗呢幾年，佢成日求我復合，想我再同佢生個女，仔女對佢嚟講有商業價值，但我點都唔肯。」3年前八両菜母子重逢，曾計劃一家三口到韓國旅行，八両金最終沒參加，八両菜說：「如果大家同房唔同床都冇所謂，但八両金要我畀晒錢，我覺得一家三人去，佢要分一半錢，佢唔肯畀錢咪冇去。」
「家用都冇畀」
八両菜力斥八両金貪錢，她說：「我同佢結婚幾年，佢一毫子家用都冇畀，只係3年前我搵番個仔，當時我工作唔如意，佢畀過1,000蚊我買衫。今年母親節，我同阿仔食飯，阿仔叫黑松露餐，食咗600蚊，都係我埋單。今年農曆年返佢家團年，阿仔竟同我講：『阿媽你好耐冇畀家用』，結果團年飯食唔成。」
對於八両金教八両仔要孝敬母親，八両菜卻爆料：「八両金對自己阿媽都唔係咁關心，一個老人家每日放低碗飯畀佢食，呢啲生活，再窮我都唔使佢養，我有能力自己照顧自己。」八両菜形容離開八両金是重生：「絕對係逃離魔爪。」現職地產經紀的八両菜不希望八両金再利用她博宣傳，她希望低調生活。八両金就前妻反擊指控，他昨日在電話口窒窒回應：「佢點講我唔會鬧佢，我心知肚明。」
採訪：劉敏
