林珊珊男友Michael Chan是星級健身教練，曾教葛民輝、杜汶澤、古巨基、鄭伊健、薛凱琪、鄭欣宜、謝天華、陳小春、草蜢等操肌，最成功的是幫阿葛和阿澤變肌佬，Michael於98年開始教健身，學生由14歲至70多歲都有。
Michael日前接受電話訪問，坦言見到藝人有成績感到好滿足，他說：「阿葛一星期做三次，阿澤就四、五次，每次個半鐘，佢兩個都好勤力，阿澤後期見到自己有肌肉，好鍾意邊做邊玩自拍。」Michael提供健身秘訣：「通常教佢哋先做負重運動，再做帶氧運動，仲要留意佢哋飲食，餐單唔係人食，夜晚7點後唔可以食碳水化合物同生果，最好係白灼，但唔使戒肉，否則冇蛋白質。」問男女健身有甚麼不同？他說：「女仔玩負重會輕啲，最鍾意做bye bye肉、腰同大髀。」
去年欣宜因為演出亡母沈殿霞的紀念騷，開始跟Michael玩健身，但近期欣宜翻脹鼻都肥埋，對於欣宜的失敗，Michael說：「我冇失望，之前佢為個騷減咗20磅，其實佢𠵱家都有keep住做，想啲肉實啲同練吓氣，反彈原因可能佢飲食冇檢點，覺得肥瘦冇所謂，唔會瘦咗鍾意佢多啲。」
採訪：皓騫