丁屋政策係時候了斷。莊文強、麥兆輝執導的電影《竊聽風雲3》將於下月5日上映，電影由一眾好戲派劉青雲、古天樂、方中信、曾江、周迅等主演，題材圍繞港人關注的新界地產問題，又疑似影射鄉紳，再配合層出不窮的宣傳攻勢，未上畫已令港人引頸以待。兩位導演直言電影未上映已挑起話題，證明刺中了社會上某些要害，更聲言不是揭秘電影，只是有些問題太赤裸裸地出現卻一直沒有人處理，丁權這個特區政府的死穴，如何可以了斷？
撰文：馮國康
【香港上映日期：6月5日】
【土豪篇】—方中信「似上海仔就成功！」
電影《竊聽風雲》系列，除了三個骨幹演員，方中信肯定是中堅分子。《竊聽風雲3》麥兆輝和莊文強委以重任，造型耀眼奪目，冬菇頭加茶色太陽鏡，造型參考自江湖人物「上海仔」郭永鴻，對此他有少少避忌：「我唔知似唔似？造型就OK，背景就唔似，佢哋都係想攞個gimmick，咁如果我真係做得似，我都幾成功㗎！希望似喇！希望佢唔好嬲我喇！講真咁耐未試過，拍時裝片要戴個假髮由頭戴到尾，嗰時好熱都幾辛苦下，出到嚟個個都話幾特別。」
《竊聽3》陸氏家族四大土豪，方中信飾演的陸永富，排行第二，是陸家得力幹將，不過性格爽直粗獷，脾氣火爆，是典型老粗。由小型建材生意做到大型建築公司，全靠丁屋工程圖利，方中信說：「𠵱家叫土豪，係一個比較old school嘅原居民，即係阿爺剩落好多地，跟住就我同青雲同家棟、嘉華哥一齊諗辦法將呢啲地同其他人合作，令樓價標升係一個咁樣嘅古仔。」
對長輩講圍村話
火爆土豪，應該點演？方中信說：「某程度上有啲位都幾誇下，要切合番冇乜受過教育，一路都係新界地方長大，由細到大冇出過去乜嘢地方，咁個人變咗old school。」戲入面，陸永富要有客家腔，於是考起了方中信：「後尾導演要求我成部戲重配過對白，佢話叫我夾雜番客家話，要插番啲客家鄉下話落去，有啲位同啲輩份大嗰啲人要講番啲圍村話，佢哋都好認真，特登搵啲圍村人坐喺度，一路教我一路配。」
《竊聽風雲3》是完結篇，今次更加不少得方中信，錢可以抽時間再搵，好戲是要把握時間拍，方中信寧推掉一些工作接拍《竊聽3》，他說：「我覺得呢部戲係值得花時間落去，麥、莊兩位導演，每一次都有新意，佢哋嘅構思比較另類啲，我幾鍾意佢哋啲作品，因為呢個戲係冇乜動作場面，拍部咁嘅戲冇用動作場面去吸引觀眾入場，係一個幾大膽嘅嘗試。」
爭地，是香港一大議題，政府想搶，地產商想爭，原居民想要，香港市民如何自處？方中信說：「真係要發展，因為樓價咁高，發展真係要㗎！但係有時聽番啲原居民良心話，我作為香港市民，香港真係有咁多地可以發展，唔一定要收番啲原居民地，上次我好記得有一個新聞係話政府要收地，嗰啲吊雞車架架五十噸點擺？一定要空曠地方先可以擺到，邊有咁野蠻，收番塊地你叫人泊邊！唔係話咁強硬話收就收，加上環保呀！同埋唔好淨係掛住起樓，好多嘢都係要保護番！我同意要發展，郊外往外推，有啲嘢要因應番當時嘅條件同情況。」
撰文：楊潔雯