由於學民思潮成員好多都好似黃之鋒咁「未夠秤」，所以佢哋喺官方或者民間嘅投票日，都冇得投票。但係街工搞緊嘅社區公投，終於為佢哋帶來佳音。學民思潮周庭話，由於街工嘅社區公投只要年滿15歲就可以投票，今年17歲嘅佢終於可以投票。
周庭噚日出席街工嘅社區公投啟動禮時話，今次終於可以投票表示自己支持公民提名嘅力量。佢話，唔少西方國家都有公投法，可以畀市民集體就公共政策投票，但係至今香港都仲未有公投，所以欣賞唔同組織喺社區搞公投，以反映民意。佢重申，區議會、立法會選舉一直以嚟都係用公民提名，唔明點解惟獨喺特首選舉，公民提名就被指違法。