下月10日是Beyond主音黃家駒的52歲忌辰，怎知在家駒冥壽前，其弟黃家強和已反目的Beyond前經理人Leslie Chan在微博爆駡戰，Leslie暗寸家強的國語好爛，恥笑家強將自己的名字講成粗口，兩人在網上開拖！
笑家強國語爛
事緣Leslie前晚在微博率先發功，貼了家強宣傳下月在上海舉行演唱會的視頻，留言嘲笑：「『大家好，我是含x剷？』…嘩、哈哈哈！唔係嘛？91年到𠵱家啲國語都仲係咁爛嘅？唔該搵人教吓佢發音啦！點解可以將自己個名讀成粗口咁嘅？哈哈哈、funny！」
受靶的家強昨午在微博留言反擊，暗寸Leslie似遊魂野鬼：「有甚麼讓你放不下，有甚麼讓你看不開，太執着只會讓你萬劫不復，像遊魂野鬼般永不超生，這又何苦呢！心廣才可以體胖，才會快樂呀。共勉之！（請對號入座） 」網友紛紛留言撐家強，Leslie不忿回應：「佢講自己個名真係講到好似 『含x剷』 咁喎，咁樣叫做侮辱佢？」昨再致電家強，但他未有接聽。
而曾跟家強發生齟齬的Beyond另一成員黃貫中（Paul），下月亦蒲頭出席尖沙嘴舉行的龍舟嘉年華「亞洲搖滾聲勢力」音樂會，Paul擔任壓軸嘉賓率領中港台樂隊演出，其中包括糖兄妹、享樂團、旺福樂團及楊乃文等。
撰文：皓騫