演藝路難行，不少藝人轉行另覓出路，主持婦女節目的黃宇詩，最近自資6位數字，在中環由荷李活道警察宿舍活化為創意產業中心的「元創方」賣bra，放下藝人枷鎖的她直言：「去到呢一個階段，係想自己創造啲嘢出嚟，而唔係等機會。」誓要賣bra出生天！
黃宇詩早年離無綫轉投港視，膽粗粗冒險走到瓦努阿圖拍特輯，希望有一番新嘗試，可惜港視開台無期，遺傳了爹哋黃霑的創意思維，黃宇詩兩年前在網上開設自家品牌me Me＆Ｍe賣bra，雖然創業路難行，幸好很快得到一班顧客，結果在她們的支持下，最近決定開舖做門市生意。
「今年係我新開始」
黃宇詩日前在中環的新舖接受訪問，新舖內裝修簡約，兩旁分別掛了近10款bra，談到籌備過程，她說：「之前網購啲客人畀咗好多信心同反應我，係佢哋令到我想開舖，嗰陣我周圍物色地方，我都唔係睇地舖，諗住揀樓上舖，但係條數都計唔掂，就算租金係平過地舖，我都要攞好大筆錢做宣傳，帶動唔到件事，所以咪放低先。點知舊年行開呢頭，見到呢個地方好靚，朋友話好似有得租，嗰陣搵咗啲資料，見到啲租金又唔算太貴，所以我咪試吓寫計劃書，可能我做咗兩年網上生意，加上又籌備咗一段時間，所以對方好快叫我去面試，最後喺年尾最後一日，收到佢哋嘅通知，我成功咗，嗰刻真係好開心，2014年係我嘅新開始。」
「我似老竇咁花心」
至於會否放棄幕前工作？黃宇詩說：「我唔知呀，我似老竇咁花心，花心係雖然我好鍾意呢度，但係嗰個享受感覺又唔同，最好係呢度上咗軌道，跟住一年做一個騷，趁後生為自己將來鋪路，我唔係嗰種無路可走，走嚟做生意嘅人，所以唔好框死自己，乜都試吓，唔work唔代表世界末日，兜個圈返嚟又會唔同。」
對於這個得來不易的新開始，宇詩由籌備、裝修，設計新貨，全部一手一腳在短時間進行，而她笑稱賣bra這行業頗為冷門，要多加努力，她笑說：「我明白始終有啲難度，我相信一定會有同道中人，𠵱家開咗未夠一個月，生意so far so good，已經好好。我又冇覺得尷尬，亦都冇做藝人嘅枷鎖，以前成日都好介意人哋點睇自己，可能我係喺一啲好出名嘅屋企成長，好驚自己會做錯嘢，變咗唔可以做番真正嘅自己，但𠵱家因為人大咗，生命苦短，無謂再顧忌人哋諗乜，去到呢一個階段，係想自己創造啲嘢出嚟，而唔係等機會，當然如果有人搵我cast（試鏡），都會諗吓，𠵱家會專注喺生意。」黃宇詩坦言這個亦是她的理念，希望女性可自由自在顯露個性，隨時隨地發揮自己。
「目標想多幾間舖」
在設計的過程，難免會碰釘，黃宇詩笑說：「碰釘一定有好多，我成日都周圍試、周圍睇，有時出嚟效果同設計有啲出入，試過啲定單比預期貴咗，好彩我自己去內地搵布料，學識好多唔同步驟，雖然係辛苦，但係基礎打得好，跟住會好順暢。」
幸好現時設計已經進入軌道，黃宇詩說：「當然可以再好啲，size可以多啲，大啲，𠵱家設計咗12款，每款有唔同嘅顏色，希望跟住保持住每個月有一個新款。我目標梗係想多幾間新舖，可以有多啲products，又或者可以分銷出去。𠵱家訓練到自己一睇知size，試過好多次都估中，好滿足，係絕世好bra嘅眼。」
採訪：何慧斯、羅慧敏