NBA季後賽東岸決賽，溜馬啱啱喺主場輸畀熱火，場數被追成1:1冇咗主場優勢。嚟緊香港時間下星期日早上會進行game 3，正路溜馬球員呢個時候應該全力備戰，點知射手L史堤軒臣俾人踢爆落單叫應召女郎去邁阿密尋歡，仲預埋隊友保羅佐治一份。溜馬3寶今季負面新聞多多，到咗呢個關鍵時刻都仲係咁唔生性，如果最後俾熱火踢出局真係與人無尤。
L史堤軒臣約應召女郎
溜馬孖寶保羅佐治（PG）同希拔都已經夠麻煩，得分後衞L史堤軒臣都唔執輸，間中都會搞吓事。美國有網站爆料，溜馬喺周二東岸決賽game 2主場輸畀熱火之後，史堤軒臣最關心嘅唔係點應付第3場賽事，而係約女喺作客邁阿密之旅梳乎吓，個網站仲公開埋史堤軒臣同應召女郎嘅電話短訊對話。內容單刀直入，呢位同爆炸糖有得揮嘅囡囡，藝名叫Candy Deepthroat（深喉糖），佢話印第安納呢個地方咁悶唔會去，史堤軒臣就話今次交易地方係邁阿密。可能史堤軒臣同PG好friend，就話會帶埋佢去一齊玩；囡囡開價2,500美金一晚但唔肯「3人行」，見史堤軒臣想講價仲打算同佢byebye，最後史堤軒臣加碼到3,000美金，傾掂數。
插水被罰5,000美元
其實史堤軒臣喺溜馬人工唔高，今季得大約100萬美金，相比起年薪超過1,400萬嘅希拔同下季開始都過千萬年薪收入嘅PG真係小巫見大巫。不過佢喺今季表現大躍進，加上今季後就會約滿，肯定有份肥約等緊佢簽，所以使錢都唔手軟。佢喺對熱火game 2場波因為誇張插水倒地，被聯盟處分罰款5,000美元，對佢嚟講都係濕濕碎喇。
史堤軒臣嘅好意，保羅佐治或者只可以心領。佢喺game 2意外俾獲迪撞暈，經檢查後有腦震盪情況，可能唔可以喺下仗上陣。呢個時候有桃色醜聞又有主將上陣成疑，真係祝溜馬好運咯。
