郭富城為浙江衞視嘅《中國好舞蹈》擔任導師，上星期喺上海錄影時，佢見到一位香港參賽者好熟面口，諗諗吓終於記起嗰個人10年前曾經做過佢dancer，呢位參賽者叫麥秋成，係電影《狂舞派》舞蹈導師，一直好崇拜城城，諗唔到佢會專程跑去上海比賽，最後仲入咗圍，揀咗城城做佢導師，呢集會喺聽日播出。
為《狂舞派》舞蹈導師
日前佢同其他入圍舞蹈員齊集香港，接受城城同另一位排舞師Sunny Wong嘅訓練，準備另一場挑戰賽，原本想訪問吓麥秋成，但因為大會規矩，所有入選者唔可以喺 參賽期內接受訪問，所以馮仁昭只好搵佢導師城城傾下，城城話：「好開心有香港舞蹈員嚟比賽，麥秋成表現好出色，我哋三位評審係三票全通過，佢先至可以入圍，絕對唔係因為佢曾經做過我dancer，我就偏私畀佢入圍，不過最後佢揀咗我做佢導師，我都好開心，一定會用心教佢。」
城城認為麥秋成已經做過《狂》片舞蹈導師，部戲咁成功，算係闖出一番事業，喺呢個時候仲肯嚟參賽，真係幾難得，而《狂》片監製陳心遙知道麥秋成入圍都為佢開心，有打電話恭喜佢，原來呢位成哥都有客串《狂》，唔知觀眾認唔認得出邊個係佢呢？
撰文：馮仁昭