內地著名男星、以「好好先生」形象示人嘅黃海波，因為日前於北京某酒店嫖妓斷正，被收到風上門嘅警察逮個正著。黃海波直認不諱，被拘留15天。而佢同張靜初合作拍緊嘅劇集《一場奮不顧身的愛情》被傳面臨停拍。
風頭火勢，最好就係同黃海波劃清界線，好似佢前女友莫小棋咁啦，梗係蛇咬都唔認啦！不過日前就爆出黃海波嘅另一半係邊個——原來佢同正牌女友、內地女星曲柵柵未分手，兩人甚至已經有了結婚打算。昨日仲連女方嘅索爆比堅尼look都俾神通廣大嘅網民搵埋出嚟！
據內地報道，曲柵柵曾出演過《神探狄仁傑》等影視劇，今年32歲，細過黃海波6歲。兩人去年夏天於一個朋友聚會認識，當時兩人都係單身。報道仲話，黃海波曾表示好驚呢段戀情曝光，因為怕見光死；又話黃海波對呢段情相當認真，一早plan定結婚，o依家仲同居緊，並隨時準備生B。
咁點解仲要滾呢？據報道話，黃海波比較喜歡去高檔場所玩樂，對身材高挑豐滿嘅女性情有獨鍾。每次到外地拍戲，都「偶爾」去高檔酒店會所尋歡。