【咖喱篇】西甲係咪歐洲最強聯賽？都好難話唔係，無論計球星，定係計球隊實力，西甲都毫無疑問地稱霸歐洲。
先睇最客觀數據，歐洲足協嘅聯賽系數，今季西甲拎到22.714嘅高分，喺近5季都未有聯賽拎過咁高分。總計近5季嘅總分，西甲以97.427分，拋離第2位、英超嘅84.748分。點解西甲咁高分？因為巴塞呢幾年喺歐聯成績好，皇馬同馬體會今屆仲會師歐聯，但最重要嘅係，一眾西甲中游球隊夠爭氣，喺歐霸盃屢創佳績。近5屆歐霸盃入面，西甲拎咗3屆冠軍。
西甲培訓出當代球王美斯，應屆金球獎得主基斯坦奴朗拿度就喺皇馬越踢越好，繼續進步，當然唔可以唔提加里夫巴利同尼馬呢啲新一代球星。講身價，講榮譽，有邊個聯賽嘅4大球星可以比得上呢4位。以前成日都有人話皇馬同巴塞嘅壟斷，令到西甲可觀性大減，但今季有隊馬體會彈起，仲拎埋冠軍，批評者仲有咩好講？唔通3隊爭標都唔夠激烈？英超去到季中，咪又係車路士、利物浦同曼城3隊爭冠軍。又有人話英超中游實力強，聯賽競爭力大，好睇過西甲，但西甲中游嘅西維爾有能力拎歐霸盃，而英超班中游呢？喺歐霸有咩成績？
最後，西甲3雄風格不同，睇控球，有巴塞；睇球星單打獨鬥，有皇馬；睇整體防守，有馬體會。西甲戰術風格多樣性，發展蓬勃，點睇都係歐洲第一聯賽。文：咖喱