【牛腩篇】西甲係咪歐洲最強聯賽？都好難話唔係，無論計球星，定係計球隊實力，西甲都毫無疑問地稱霸歐洲。
不論周六歐聯決賽戰果係點，今年歐洲兩大盃賽冠軍都落喺西班牙球隊手上；但坦白講，西班牙除咗西甲3隊，西維爾拎到歐霸盃叫做有運，球隊仲孭落成身債，其中中下游球隊更窮到褲穿窿，講平均實力，點都係英超高啲。
柏天尼呢期做晒正義超人，重罰完曼城，睇嚟另外兩支有錢球隊聖日耳門同車仔都好快俾人開刀，柏天尼仲話，收番嚟嘅罰款，會平均分畀啲窮球隊，搞到好似NBA制咁。小弟一直都唔明，有錢佬收購球隊大搞，對球壇有咩問題，咩公平原則，呢個世界有錢就搵多啲球星踢，冇錢就發掘新星；而且你話有錢球隊唔公平，窮球隊又冇問題咩，早幾年歐洲債務危機，西甲球隊俾人踢爆10隊有8、9隊都係債務纏身，皇馬、巴塞歷史傳統又有政府照住，所以保得住金漆招牌，數到去華倫、西維爾，已經講緊孭緊過億債。
坦白講，除咗西甲3隊：馬體會、巴塞、皇馬，西甲其餘球隊實力都唔強，阿仙奴棄將卡路士韋拿，都可以喺皇蘇入波入到唔識停，唔單止踢法問題，整體實力冇英超咁高都係原因。當然英超較公平嘅分賬制度都有關，雖然西甲全球轉播費都唔少，不過據報有三分二入咗巴塞同皇馬個袋，其餘球隊就分得好少；相反英超就平衡好多，今季冠軍曼城據報有8,000幾萬鎊落袋，包尾嘅卡迪夫城都執番6,000幾萬鎊，講真呢筆錢用嚟擴軍，至少都執到幾個二線國腳啦，雖然惡性循環，搞到英超人工貴到離譜，但起碼平衡各隊實力先。文：牽牛