上星期三嘅校友會午餐會搵咗三位有三十年經驗，紅褲子出身，對出外旅遊事務瞭如指掌嘅旅行社總經理S講暑期旅遊。旅遊S乜嘢旅行團都主理過，對學生遊學團都有豐富經驗，有校友向佢請教遊學團事項，旅遊S話以前呢啲團係好吃香嘅，但現在已經不再熱門，原因有二。第一，自教育局鼓勵遊學，有資助之後，各學校紛紛利用對外關係，年年搞遊學交流團，由教師帶隊，旅行社最多係從旁協助，代辦旅行手續，無利可圖。第二，香港家長愈來愈有錢，要求愈高，好多事都要干預（例如在外嘅飲食、床鋪、宿舍設施或對學習有好多批評等等），一啲旅行社不勝其煩，怕家長向旅遊業議會投訴，情願不再推出「遊學團」產品。
旅遊S話出外遊學，只是增廣見聞，實際學習時間不多，佢勸家長不必送十二歲以下嘅學童出外，以免心掛掛。十二十三歲先至參加遊學團都未遲。
香港一啲家長，確實對孩子太過包容嘅。闊太L幼承庭訓，不可炫耀財富，所以佢嘅孩子買波鞋只係買三四線品牌，故意示人以弱，但佢嘅司機就買千零蚊一對嘅一線名牌波鞋俾個女着，闊太L對司機講：「阿力，你駛唔駛用咁多錢買波鞋呀？」司機力如此回答：「阿女出外見人，唔可以寒酸嘅！」闊太L有一次自倫敦回港，CX商務機艙上，見有幾位回港放假嘅中學生，不禁嘆一聲：「人地阿媽真包容。」佢自己係要到社會做事後，父母先至帶埋佢坐商務艙嘅。
港人有咗錢就想享受，坐吓郵輪慢慢嘆，唔參加鴨仔旅行團。旅遊S近年專攻郵輪旅遊，話幾年前各大郵輪公司非常樂觀，大事興建新郵輪，呢兩年新郵輪下海供應大增，郵輪遊價格急劇下降，益晒旅遊人士，佢不久前就以6999港元價錢辦七日歐洲郵輪團，仲送埋機票飛去歐洲落船，聽到成班校友嘩嘩聲。有校友問：參加Early Bird訂位攞折扣好唔好呢？旅遊S笑曰：「早起的鳥吃高價早餐，現時最好在航程前兩個月先至報名，隨時搵到打幾折嘅航程，但千祈唔好揀在中國城市落船嘅郵輪，理由不必細說，即使郵輪經過上海，你要上岸行一行，手續亦麻煩不堪，成船人要排隊幾小時！」最高級郵輪呢？旅遊S話不惜腰間錢可以參加德國Hapag-Lloyd，最新超級豪華超級服務，船員以德國人、中歐人為主，服務好傳統專業，與現在常見嘅東南亞船員相比，有何不同？去一次就知道晒嘞。
飯後返到辦公室，見師兄校友張總電郵，話兩公婆自上海飛往東京，乘郵輪往阿拉斯加，往後75天坐船環遊世界，在英國下船，再回巴黎度暑假，羨慕死左丁山。