早前鄉議局大會，新界地主紛紛現身，冥冥中為電影曲線宣傳，十八鄉鄉委會主席梁福元最直截了當「某些電影譁眾取寵，若影射無辜的人就不好。」上水鄉委會主席侯志強更拍心口要請劉皇發看電影，一眾鄉紳變相支持《竊聽風雲3》。
探索土地意義
事實上《竊聽》系列由第一集講股市、第二集講洗黑錢，而即將上映的第三集則以地產作主題。離開市區，麥、莊帶大家進入新界，窺探丁權利益之龐大，莊文強說：「同好多地產商傾偈，佢哋講咗好多喺新界做生意遇到嘅問題，大型地產商一樣遇到問題，我哋覺得幾有趣，喺穿針引線之下我哋就認識咗啲新界朋友，佢哋講咗好多故事畀我哋聽。」
近年新辭彙「地產霸權」令大家都咬牙切齒，不過麥兆輝卻說：「我哋唔止講地產，係講霸權，因為佢哋無孔不入。我哋故事係大膽假設喺5年後，如果政府取消咗丁權會點？作為一個導演同創作人，要有勇氣講想講嘅故事，我哋唔係要去反對一啲嘢，而係借助一個獨特嘅地產環境講一個故事。」
整個香港近年愈來愈暴躁，每有唔啱聽之事大家就嘈個面紅耳赤，問兩位導演可會擔心新片又引起罵戰？莊文強就輕鬆地說：「個個問驚唔驚，其實你哋係咪好驚呀？哈哈哈！社會唔同咗啫。其實寫劇本或者拍一套戲最緊要係準確，我哋部戲未上大家已經有咁多睇法，咁即係我哋選材好準確，我哋拮中咗某啲要害囉，但係呢樣嘢（丁屋問題）唔係我哋創造出嚟㗎嘛。」
近期電影如《紅Van》、《香港仔》等都暗示香港今非昔比，《竊》片是否亦想帶出香港人受霸權和政府不濟下的苦況呢？麥兆輝說：「我哋唔係有乜嘢暗喻，而係有個想法喺入面，個訊息係：土地應該係點嘅呢？大家應該思考吓，不停發展但係實際上只係樓價上漲咗，人到底有冇進步到？定係發展只係為咗某啲人嘅利益呢？」
撰文：藍文浩
場地提供：E-Max