海洋公園再添新成員。三隻來自大連嘅雌性斑海豹，喺4月同5月先後誕下雄性小斑海豹Ocean、Sonny同Sammy，最細只有18日大。三隻小斑海豹性情各異，Ocean對人友善，Sonny好奇好動，Sammy則較文靜。
原來今次係本港首次成功繁殖斑海豹，而啱啱出世嘅斑海豹長有白毛，斷奶後自然脫落；成年之後，每年仍會換毛一次。班海豹有30至35歲壽命，四歲起可以生育，每年3至5月係發情期，每胎生產一隻，懷孕期長達330至360日。而呢三隻小斑海豹，最快喺今年暑假，等佢哋能夠正常進食小魚後，可以同公眾見面嘞。