溜馬面臨自爆，另一邊西岸嘅雷霆都唔好得幾多，周三西岸決賽第2場作客馬刺77:112慘敗，一對得分主力杜蘭特（KD、前）同韋斯卜（0號）克表現麻麻各得15分，落後到場數0:2，出線形勢唔多樂觀。
常規賽MVP杜蘭特今場波16射6中，4次射3分全部失晒，到第2節嘅時候佢已經頭耷耷，俾隊友韋斯卜克喺隔籬怒吼都冇乜反應。雷霆冇咗伊巴卡真係唔多掂，KD同韋斯卜克各得15分，其餘3個正選表現慘不忍睹，加埋都只係得4分。
馬刺又係贏整體，柏加攻入全場最高嘅22分，陣中仲有另外4個球員拎到雙位數得分，包括3分球10射7中嘅丹尼爾格連。馬刺喺香港時間下周一會作客雷霆，再贏嘅話睇嚟今年再入總決賽都冇乜問題。