首次參與《竊聽》系列演出的林家棟，今次在《竊聽3》的土豪兄弟幫中，飾演輩份最低，學歷最高的土豪，家棟說：「呢班係水平比較低嘅人，青雲係最有智慧，我係爛頭蟀，心直口快，有時做小丑，表面上大家係好兄弟，內裏有私心，方中信對佢太太黃奕唔係咁好，我就愛護埋佢啲家人，同黃奕關係一發不可收拾。」《竊聽3》以圍村做背景，幾個同宗同族出現矛盾，涉及情感問題。家棟表示，他與黃奕親熱戲點到即止，他說：「激就唔係好激，但個震撼力會大，咀吓攬吓例行公事。」
尋找有高潮的劇本
「土豪未必係負面詞，只係反映佢哋嘅生活態度，點樣用金錢去滿足一切慾望。佢哋未必有專業技能，唔知點解充滿咗財富，同時佢哋未必識得善用財富，但係佢又冇錯，我身邊都有認識呢啲人，但係我又唔覺得有好大問題，佢唔識善用，可能將來身邊有人教曉佢都唔出奇，不過可能我哋睇到將佢負面化咗，其實都唔應該係咁。」家棟對土豪的解讀。
家棟指戲中眾人角色並沒有將土豪負面化，甚至為兄弟眾人加添了浪漫位，家棟說：「我哋幾個一齊唱歌，其中一場講我call啲女仔返嚟玩，開心過後，大家都好落寞，開心過後靜落嚟，大家會諗頭先個片段係唔係真嘅，再回憶番之前大家幾兄弟嘅關係。」
林家棟自言，入行20幾年，不時會問自己其實想求甚麼，他說：「除咗自己爭取機會，希望可以給予新人機會，呢幾年我會諗呢樣嘢，講到點睇錢，夠就得啦！我會諗，究竟我活喺呢個世界有冇意義呢？」身為其他電影監製的林家棟指，現在機會來得容易，很多新人不願意把握，不懂珍惜，家棟說：「近年自己想做導演，但要搵個令自己有高潮嘅劇本。」
撰文：張俊銘