本月31日出任監警會（IPCC）主席滿6年嘅資深大狀翟紹唐，最近去意已決，同政府表明唔想打破政府「六六原則」延任，所以一班委員早前為佢搞Party講再見。而翟少卸任後嘅主席位，據聞引起唔少梁粉虎視眈眈，其中一位已經被保安局ban咗；至於其他梁粉可唔可以跑出？睇吓政府怕唔怕寒涼嘞！
聽聞有醫生自薦被ban
八方聽聞監警會委員嗰晚搞嘅farewell party，查實以「中學校服誘惑」為主題，但翟少就hea着西裝出席，監警會副主席林大輝，就加個校章上身算數。
最終一眾男委員中，只有張達明最「有心」，full gear着住皇仁套白恤衫同白褲校服出席。委員席間送咗幅有各委員靚樣嘅畫畀翟少留念，翟少話非常唔捨得大家喎。
翟少離任，佢嘅主席位引起梁粉爭逐。八方聽聞有位梁粉醫生，一直吼住翟少個位，一度向政府自薦做主席，但最終被保安局ban咗，原因係個位應由資深大律師出任。另外亦有一位退休法官成功「過三關」，包括獲律政司司長袁國強推薦、保安局同意，以及狼英大內總管高靜芝首肯，但唔知點解當事人話唔想做。對其他仲爭緊位嘅梁粉嚟講，當然係一大喜訊。
有監警會委員話呀，要搵翟少嘅接班人好棘手，因為一般大狀寧願用多啲時間去搵錢，而且要做到翟少咁相對中立、人人讚好都唔易，希望翟少捱義氣，做多一陣主席先走人。
李八方
mailto:[email protected]