原裝正版大黃鴨雖然走咗，但翻版黃鴨梗有一隻喺左近，就連葵青區議會嘅會議室都有鴨到，大大隻黃鴨同區議員開會。
八方向區議員打聽過，原來呢隻黃鴨係民政署早前喺區內舉辦嘅青年活動作品，由一班年輕人製作。眼見活動過後黃鴨無家可歸，民政署建議畀佢進駐會議室，大部份議員都支持唔好嘥咗件作品，加上唔算太阻碇，所以由今年年初起，黃鴨正式成為會議室「住客」。
可惜黃鴨冇投票權，否則可以幫吓區議會內被欺壓嘅泛民。話說區議會轄下嘅公共交通工作小組噚日開會，建制派冇乜人出席但又用授權票壓泛民，硬要通過佢哋嘅建議，泛民議員最終離場抗議。