娛樂圈近年BB當道，吳千語亦被稱BB，不過這位BB年紀最輕，又有一個「好愛」「好愛」她的男友林峯，令一眾女生又羨慕又妒忌，戀情浮面後人氣急升，萬千寵愛在一身，出道３年已收穫甚豐，還要追求甚麼？BB四字真言竟是「活在當下」，完全超出了預期的人生金句。也許，人生真不需計劃太多！非一般的90後，自有一套人生大道理。
統籌：林妙萍
撰文及造型：顏英儀
攝影：周樂恒
化妝：Hubei Har of Atelier'd Arris
髮型：Kenki Lau of Queen's Private i
吳千語當年跟男友林峯合作電影《男人如衣服》時撻着，拍拖後即公開戀情，奠定女友千語的地位，雖然年齡相差14年，但兩人零代溝，林峯更公開高呼七次好愛千語BB，「吳七愛」之名因此而來，千語回想讀書時拍拖因怕父母鬧，「總要偷偷摸摸，怕畀阿媽知道。」現在光明正大，好不自由，旁人看「峯語戀」多姿多采，拍拖不久已多次出埠預支蜜月，儼如連體嬰，但千語覺得拍拖要少見為妙，「拍拖最好唔好成日見，要有私人時間，未必成日兩個人，可以係五個人、七個人一齊，我鍾意群體生活，約埋一班人吃飯開心啲，兩個人有時對住都唔知講咩，所以有共同朋友好緊要。」
會結婚生仔
有指林峯月租8萬豪宅與千語過半同居生活，BB可有親自下廚𠱁男友？千語即甜笑說：「都有，有時間都想研究廚藝，識煮嘢食點都會加分。」林峯與千語BB拍拖不久已帶女友見家長，被問到可有被催婚時，即尷尬說：「佢屋企有兄弟姊妹，妹妹都結婚生了BB，Uncle同Auntie都做了公公婆婆，所以冇催婚，呢個年代都係順其自然，長輩冇畀壓力，我好鍾意小朋友，見到BB衫好得意都忍唔住買畀朋友，我將來都會做媽咪，人生應該要經歷結婚生小朋友先算完整，不過𠵱家事業緊要啲，因為我入行3年，想累積更多經驗，唔想辜負好多人對我嘅期望，呢段青春係要嚟工作嘅。」
港女要求高
千語今個月尾將會開拍一套香港人追女仔回憶的愛情小品，「戲中我飾演一個普通上班族，同男主角嘅愛情線不太強，感情由有到淡。」新戲演港女，但港女一詞卻很負面，千語BB卻為港女抱不平，「一開始港女唔係一個貶義詞，唔知幾時開始港女變了多要求、又苛刻 又麻煩，鍾意使男朋友，變成貶義負面；但港女對我來說是形容香港女仔，冇褒義冇貶義成份，香港女仔係比較要求高，可能香港人生活節奏快，對自己工作有要求，標準比其他人高，我都係一個心急嘅人，唔想自己有惰性，行步路都快過人。」
要活在當下
90後經常被人看成冇責任心，不夠成熟，可是眼前千語的言行舉止卻予人思想成熟世故，問到90後的人生觀時，更講出人生大道理，「我覺得做人要活在當下，好似好老土咁，好多人諗得太遠，計劃太多，而miss𠵱家享受生活的moment，無論工作、生活、對朋友和家人都要珍惜，特別九十後要珍惜𠵱家嘅青春。」
增肥失敗
減肥是女人畢生的任務，可是BB卻為增肥而煩惱，來到影樓拍攝時，逢人見到千語BB都會說「又瘦咗呀？」5呎8吋高的千語BB瘦到我見猶憐，努力增肥可惜失敗，「其實我有增肥，但唔成功，每次增肥唔知點解就會病，個人變得好弱，抵抗力好差，其實肥瘦都係其次，最緊要健康，希望keep番身體好啲先，人人見我都話我瘦唔食嘢，但其實我一日要食5餐，每晚都食消夜，如果唔係就瞓唔着，可能年紀大啲會肥，到時要減肥，哈哈！」
更多精采時尚內容，盡在 http://add.appledaily.com。