校友C父親逝世，在報紙刊登訃聞，左丁山一睇，先知道佢原來有一兒子，名字用黑色四方線圍住，即係表示已不在人世咁解，我地從來只知校友C有兩位可愛千金，今次見到訃聞，才發現此一「秘密」。中國人對兒女少時夭折之事素來視為忌諱，不願多談，旁人即使知之，亦會識趣唔講，代守秘密，以免觸及父母心靈之痛。
最近報紙大事報導之劉美娟兒子在出生時夭折嘅新聞，係因為有產科醫生涉嫌行事不當，可能醫治疏忽，劉美娟與丈夫要求醫生專業團體徹查，以免同樣事件再發生，故此為了公道及要求有關人士負責任，不惜暴露家庭忌諱，不顧心靈創傷，與醫生纏鬥九年，整個過程既艱苦，又花錢，而且為自己增添極大心理精神壓力，所為何來？若非有極大冤屈，氣憤難平，早已講聲「罷、罷、罷」，為九年前悲劇劃上休止符了。我地外人對劉美娟夫婦有無限同情，更望專業團體能秉公辦理，向社會有一個清晰交代。點知道，在五月十一日星期日，主持調查嘅委員之一麥列菲菲面無表情咁對住記者講，因適值母親節，委員有活動，故延遲決定。九年了，劉美娟精神上受盡折磨，委員會竟因為母親節而要佢等多十零日，委員們固然有母親，佢地與母親慶祝母親節時，唔知道有冇將劉美娟呢位母親放在心上呢？
記者G即將臨盆產子，今個星期開始前二後八共十個星期嘅產假，睇佢腹大便便，左丁山不時叫佢行路唔好咁快，唔好聽見有新聞就想跑。點知上星期四放假之前，佢行路時，手機聲響，如其他女士嘅慣常動作，就係伸手入手袋搵手機，睇唔到前面有泥頭，一腳踩落去就向前仆，記者G急忙用揸住手機嘅右手與左手一齊撐落地護肚，幸好不至打直瞓落地下，手機iPhone就碎咗咯。孕婦如有此等事情發生，本應求助急救，進入就近急症室，但佢為人老實，醒起是日要到鄧志昂醫院覆診，於是起身就繼續行程，過海返回灣仔入醫院，醫生知道佢仆親，急忙為佢檢查，幸好個胎無事，但左手好痛，於是轉送律敦治醫院急症室，等咗兩小時才有醫生睇佢，話左手有輕微骨裂，轉佢去骨科，骨科已下班了，要擇日再睇，以後幾個月，恐怕抱唔到BB了。各位女士行街唔好掛住搵手機、睇手機呀！男士都一樣。