年幾以來科網股熱潮，有句歌詞非常貼切：「那麼瘋癲過，那麼珍惜過，那麼動地驚天愛戀過」。水漲船高，近年突然唔少angel fund走出來，話要扶持start-up，大家都抱住共同目標，如果一個唔覺意扑中一間俾巨企收購，咁就發喇。
最近香港終於又有間start-up出人頭地，一間主打將電話「一機二用」嘅軟件公司Divide，最近落實獲Google收購。收購價就冇公佈，但公司過去已籌集2,500萬美元（約1.9億港元），收購價更高是常識吧？查實Divide都唔係第一間香港發到達嘅start-up，先前賣畀雲遊（484）嘅《神魔之塔》收購價超過5億元！先唔理佢單刁係咪真係會撻Q，本地初創企業竟天價賣走，你見一向鍾意認屎認屁嘅政府，咁耐都冇行出來領功，就知連政府都覺得隻Game係101%抄襲，唔敢搞大佢。所以今次Divide收歸Google旗下，就真係成為香港start-up之光。早兩日有幸出席數碼港搞嘅start-up酒會，同啲angel fund傾過計，佢哋都覺得呢一年初創投資氣氛好咗好多，不過問題係越來越來唔識IT嘅人，走去投資IT。的確係，菲菲朋友去杭州搞間IT初創，間公司咩都未有，就有班「有錢冇掟使」嘅土豪認頭，羊群心理下，個個掟幾千萬落去。套用「師奶炒股，大市見頂」理論，如情況持續，估計兩三年後，初創企業投資出現泡沫都唔奇。
Fifi
本欄逢周二、四刊出