日本AV係唔少男孩子成長嘅一部份，近年仲有睇嘅朋友相信都會識得有「暗黑林志玲」之稱嘅人氣女優波多野結衣。佢最近同一班AV姊妹去咗馬尼拉做宣傳，仲趁臨近世界盃開波，齊齊着住波衫示人。不過意外嘅係冇一個女優着日本國家隊波衫，結衣就揀咗阿根廷嚟着，原來佢最鍾意係美斯，仲想阿根廷可以贏今屆世盃冠軍。
8個女優去咗菲律賓同一間賭場做宣傳，各人着住國家隊波衫影相都係宣傳活動之一。既然難得由AV女優做模特兒，佢哋着嗰件件件都係超性感尺度，睇到班粉絲好開心。結衣有將佢哋大合照張相放上facebook，仲留咗句がんば
れー（加油），隨即有大量回應。雖然波多野結衣係日本人，但就坦言自己超鍾意美斯，希望阿根廷可以贏到今屆世盃冠軍。
AKB48借日本搵真銀
AV女優唔撐唔緊要，日本向來最識搞宣傳，之前已經搵咗寵物小精靈比卡超同埋大堆頭少女組合AKB48嚟支持國家隊。其中即將喺組合畢業嘅大島優子被委任為打氣活動大使；當然商家亦都順手變埋搵錢機會，推出印住48號嘅特別版波衫，搵粉絲一筆。至於另一亞洲國家南韓，近年喺國內湧現嘅偶像比日本仲勁，國家隊出戰世盃自然唔少得靠佢哋嚟打氣，女子組合FIESTAR同男子組合The Friends為國家隊合作作咗首打氣歌曲《I Love Korea》。南韓喺4年前南非世盃16強出局，返到國家都受到英雄式歡迎，人氣組合少女時代仲着晒熱褲勁歌熱舞嚟「勞軍」，睇嚟國家隊喺今屆世盃都會好落力。
乳神改投巴西懷抱
「變節」嘅除咗波多野結衣之外，仲有喺4年前南非世盃「一夾成名」嘅巴拉圭乳神莉爾莎列基美。佢喺上屆世盃決賽周俾人影到將個手機夾喺心口度，再七情上面咁去聲援佢祖家巴拉圭。4年之後巴拉圭冇份踢今夏巴西世盃，列基美就惟有轉投同樣係南美兄弟嘅巴西懷抱，佢最近着住綠衫黃裙性感服飾，化身巴西啦啦隊成員。