唔少內地品牌近年揚威海外，好似馬化騰嘅騰訊（暫時編號2988）咁，食住科技品牌大熱趨勢，舊年品牌價值按年大幅增加97%，去到530億美元，喺研究公司Millward Brown公佈嘅全球100大品牌價值榜中，增長最快，而且排名14，仲高過香港人好熟悉嘅滙豐。
Millward Brown訪問咗全球15萬名消費者，對於品牌嘅看法，加埋企業財政表現，計算品牌價值。
騰訊排名上升7級，取代中移動（941）成為內地最有價值品牌；中移動就跌5級，排名第15，連同排17嘅工行（1398）、排25嘅百度，4間內地企業排名都高過滙豐。滙豐排名仲要跌3級，至28名。
至於排頭嘅係美國科技巨企Google，打破蘋果四連霸，以1,590億美元，成為今年最有價值品牌。科技企業今年來勢洶洶，100大品牌當中，頭四名都係科技企業，總共有18間，Twitter同LinkedIn今年亦首次入榜。