新界土豪唔易做，好似新界人龍頭鄉議局咁，表面風光，實質成日被人掠水。話說香港工商專業協進會準備搞7.1慶祝活動，出信「邀請」鄉議局加入籌委會，畀咗兩個選擇鄉議局，一係贊助十萬蚊做合辦機構、一係「隨緣樂助」做參與機構。但原來鄉議局一早應承提供大樓畀協進會搞活動，家陣仲要俾人掠多十萬或者「隨緣樂助」，難怪唔少鄉紳有微言。有口痕友仲話，協進會封信寫明屆時活動搵咗亞視錄影及播放，咁同唔想畀人睇，有乜嘢分別呢？日前鄉議局為呢件事拗咗好耐都冇結果。見慣風浪、深信事緩則圓嘅鄉議局主席發叔最終一錘定音，話下個月先再傾啦。