學民思潮召集人黃之鋒啱啱先考完中學文憑試，一般學生哥喺等放榜期間，都係搵吓暑期工、玩吓、hea吓咁，之但係呢位學界明星一考完試就馬不停蹄，先去台灣同太陽花學運搞手林飛帆、陳為廷等人交流，又抽時間宣傳學界政改方案，力谷6.22佔中全民投票，認真分身不暇。
反應踴躍會添食
正所謂人怕出名豬怕肥，喺社運界爆紅嘅佢，甚至成為學生哥追訪對象。之鋒話呀，呢排收到唔少同學仔邀請佢做通識教育科「獨立專題探究」（IES）嘅訪問，大概有幾十人，但由於訪問題目類型相近，佢索性好霸氣咁搞場「黃之鋒IES訪問會」，一次過接受所有同學仔提問。
之鋒仲喺facebook上載報名表，自言「學民思潮的事務繁重，實在難以讓我抽空一一進行訪問」，所以決定下周五喺銅鑼灣，一take過搞訪問會。
之鋒話喎，提出訪問嘅同學仔主要想做關於青少年政治參與嘅題目，而今次訪問會嘅形式類似記招，現場最多容納50人，如果反應踴躍，可能要添食㖭呀！
八方唔知到時會唔會好似明星咁，有簽名同抱抱環節？但肯定學民思潮嘅冒起，令更多中學生關心政治。八方問過通識科老師，IES其實係通識教育科嘅校本評核習作，同學仔要揀題目做研究，可以做吓問卷調查，訪問吓持份者對事件嘅睇法等，整理資料後要撰寫一份1,500至4,000字嘅報告，佔整體評分百分之二十。
李八方
mailto:[email protected]