強國抄襲能力之強，所向披靡。「1,600熊貓遊香港，創意×保育」巡迴展下個月先正式扺港，進駐中環元創方，但呢片熊貓海竟然提前去咗大陸？八方喺網上見到，內地韶關景點廣東大峽谷，有一批同展覽一模一樣咁滯嘅熊貓，但就冇1,600隻，淨係得幾十隻咋。網上宣傳仲話喎，1,600隻大熊貓係去咗大峽谷，係「國內首場千隻熊貓秀」，又話熊貓係用廢紙循環再造，宣揚保育咁話喎！
但八方求證過，內地熊貓展同香港一啲關係都冇，因為香港呢個係世界自然基金會（WWF）法國分會同法國藝術家Paulo Grangeon合作搞嘅，內地嗰個好明顯侵權。內地有網絡商仲話可以幫客人訂製紙熊貓，一隻要成百蚊人仔㖭呀！