【六四25周年】
【本報訊】記者背包裏的器材和筆記，再重都不及被訪者的付託，25年前曾在天安門廣場上見證六四的四位女記者：麥燕庭、陳慧兒、蔡淑芳、黎佩兒，在槍聲響起的那個晚上起，承載着當年北京巿民所託，一手撥開極權的塵土，另一手以生命續寫採訪後記。真相擔子兩肩挑：見證負責監視的黨員因屠城一幕崩潰；慨嘆當年北京記者爭取不再說謊，今日香港同行畫地為牢；要記住首個為事件犧牲港人的牢獄苦難，以及不理自身痛苦，竭力守護真相的「廣場活碑」。
記者：張嘉雯 白琳
看見黨員因屠城崩潰
「這是最後的鬥爭，團結起來到明天……」89年4月，北京多次有學生和巿民遊行，在旁採訪的麥燕庭在心裏和唱《國際歌》。在香港新聞界無人不知的Mak姐，說話帶着傳統新聞工作者的冷靜，直至談起在北京保護她的幾位大媽和跟她一樣傷心的飯店服務員。
那時候麥燕庭任職《新報》，跑中港新聞。八九民運，她在4月開始跟進，5月底屢傳軍隊入城的消息，她每天巡郊外軍區，留意異動，「咁佢哋（軍方）梗係唔想我睇啦，有人想拉我埋一邊，當佢想有行動，有個大媽即刻走出嚟攔，『做乜呀，你哋人民子弟兵喎，應該乜乜乜乜。』」同一時間，幾個大媽齊齊把她送走，「我哋唔會畀佢拉到你㗎，你要幫我哋將啲真相話畀全世界聽」。
群眾只要求講出真相
另一次，她到人民大會堂西門採訪，行家舉機拍攝，閃燈觸動群眾，一度想向她們動粗，直至二人表明身份，「啲群眾聽到，就話『佢哋香港記者嚟，佢哋會講真話，唔好打佢哋。』佢哋對香港記者係好信任，真係會保護你，唔係要求啲乜，只要求你將真相話畀人聽」。
正正是這種接觸，令她「看」到平日無色無味的新聞自由，「佢哋寧願自己死，都要保護你，『你一定要將我哋啲嘢講出去』，令我真係知道乜叫新聞自由」。
6月3日晚，她在外工作，一架裝甲車向廣場東面開進，壓碎一塊石頭，她趕回北京飯店寫稿，苦戰至11時，到準備再出門時，卻發現有人守住飯店門口，她留在露台觀察長安街，看到有人拉大板車推傷者。近凌晨4時，廣場突然熄燈，「咁我哋就知，死喇，郁人喇」。
麥直言當晚感覺行屍走肉，在飯店走廊碰到李卓人，「招呼都冇打，真係傷心到呢，冇嘢可以講」。本來守在服務台監視記者的專員卻失了蹤，「我見佢坐咗喺個地下面，塊面紅晒，好落寞，我諗一個黨員都接受唔到個政府會咁做」。
「當晚好多人都有死心嘅感覺，佢係其中之一，我係其中之一」。一年後她再到北飯，發現原來的專員被貶去當門房，「我一直唔講呢件事出嚟，係因為驚佢連門口都冇得守」。
那晚她睡了幾個小時，王維林擋坦克的場面她看在眼裏，「不過我啲攝影器材冇咁好，六四當日唔係做咗好多新聞，應該去吓醫院、殮房，唔係淨係睇住條長安大街囉，too bad，真係冇鬼用」。她指事前有想過會用到槍和子彈，「但冇諗過有坦克車，個人唔係好負荷到」。
6月5日，麥乘港府的包機離京，回港後，她和行家以文字盡力記錄真相，《人民不會忘記》由此而生，5萬本瞬間售罄，五年前再印1萬8千本，今年重印2千本，六四當晚在維園出售。
六四後，麥加入記協做執委，斷續20多年，「見到啲內地行家咁做嘢，當佢哋揸支旗上街，話『我們要說真話』，我好震撼、好感動，我唔希望香港傳媒回歸後要咁樣做嘢，所以我要返嚟做記協，捍衞新聞自由」。
【六四25周年專頁】燭光不滅，血仍未冷，民主中華，花果漂零。蘋果請你一同見證：良知，從未貶值！ http://64.appledaily.com