星島集團主席何柱國仔仔何正德，同林建岳大千金林恬兒早前喺法國結婚後，周日喺灣仔君悅補擺喜酒，當日眾多政商娛樂界猛人都有出席呢場世紀婚宴，好多人仲一家大細去飲㖭，就連平時唔多喺鏡頭前亮相、財爺鬍鬚曾個仔Terence，亦同父母一齊捧場，原來佢同新郎哥喺美國讀書時已經認識，係多年老友，自然要親自到賀啦。
唔少政界中人嗰日第一次見到Terence，都異口同聲話估唔到佢仲高大過老竇，原來Terence讀書時係運動健將嚟㗎，喺校內仲攞過唔少獎㖭。
𠵱家從事餐飲業嘅Terence，有個女女讀緊幼稚園；唔知佢對於打功夫同劍擊，有冇老竇咁熱衷呢？