【本報訊】行政會議成員張志剛日前竟然表示，若將港鐵擠迫歸咎於自由行是錯誤判斷，並反稱是近年失業率低、多了人上班所導致。其歪論一出即惹來各界狂轟，張志剛昨補鑊「澄清」當時沒有講稿，只是「隨口講」、「講多咗」，直認「你話佢哋（自由行來港）對交通擠塞冇影響呢個係唔正確」。
有市民烽煙（phone-in）節目轟其言論反映管治班子水平有問題，有人更斥他是否當香港人儍。
梁振英劃清界線
張志剛多年多一直是特首梁振英的心腹，但梁昨被問及張的惹火言論亦即劃清界線，僅拋下一句「呢個問題你可以同張志剛議員討論」。張昨早先後接受兩個電台節目訪問，「澄清」當日談及香港就業情況時「順帶講吓（自由行）」，自稱「表達得唔完整」而引起誤會，個人認為港鐵擠塞有三個原因：訪港旅客增加、就業人口同步上升，加上巴士乘客量下跌，市民集中使用地鐵。
張又稱，早前看過一篇學者文章，指出自由行並非港鐵擠迫的唯一因素，又自言差不多日日搭港鐵，「我覺得逼嘅」，但強調自由行旅客增加造成的擠迫情況，特別在東鐵綫及港島綫出現，但將軍澳、觀塘等非自由行綫也很擠迫。被問到會否收回言論，他支吾以對稱：「下次會講詳細啲。」
不過，市民對張的解釋不收貨。本身是新界東居民的林先生烽煙表示，張的言論反映出管治班子的水平有問題，認為旅客人數增加是很正常，問題是政府未做好交通規劃配套。林先生又指，張在研討會上談及南韓是民主選舉國家，但示威遊行不斷，林先生憤言：「佢好似嘲諷民主選舉，不如張志剛搬去北韓啦，冇遊行示威嘅。」
市民：咪當我哋儍
黎女士批評張的言論完全不合理，「阿爺啱聽先講，根本唔係講畀香港人聽，所以港人唔使咁在意、緊張」。她強調，每個會乘搭港鐵的人，都對自由行問題心中有數，「我哋有搭地鐵嘅，都有眼睇，佢（張）咪當我哋儍嘅」。