大家記得唱《一支煙的時間》的傅珮嘉嗎？身為十級鋼琴高手兼懂作曲填詞的她，當年為張栢芝填詞的《星語心願》，獲得第19屆香港電影金像獎最佳原創電影歌曲，雖然周身刀張張利，可惜未為自己寫出一首hit爆歌，淡出樂壇後嫁給台灣老公兼誕下一子，搖身變為火鍋店老闆娘，幸福爆燈。
撰文：余燕儀
已為人妻的傅珮嘉（Maggie）於99年入行，翌年為張栢芝填詞《星語心願》摘下金像獎最佳電影歌曲，為寂寂無聞的她打下強心針，可惜時也命也，Maggie為自己創作的歌曲沒能突破《星》的成績，加上敢言性格惹來不少是非，令歌唱事業停滯不前，她說：「十幾歲就入行，一做十年，從來冇時間停低思考，出咗最後一隻碟，諗應唔應該繼續做落去？結果去台灣住咗兩年，遇到老公結婚生仔，一下子完成人生大事。」
首次開業失敗
嫁雞隨雞的Maggie，因老公想在香港開食肆，兩公婆返港創業開牛肉麵店，可惜失敗收場，她說：「台灣小店好多人去，情願成本高啲都要堅持味道，老公好想做到味道出嚟，但香港廚房講求快餐模式平靚正，味道唔夠好就加鹽加糖，唔會攞新鮮食材再熬，品質無法控制，所以決定唔做。」
租貴難開分店
經過一次失敗，Maggie和老公沒有灰心，轉在大坑開設台式半自助火鍋店「一鍋」，她說：「火鍋只需顧好湯底，其他都係自助式，開咗年幾，第五個月已翻本，本來計劃開第二間分店，但租金好貴令我哋唔敢放手一博。」
雖然火鍋店是跟友人合股，Maggie仍親力親為打點及招呼客人，她說：「覺得好好彩，自己冇唱歌4、5年，好多朋友嚟食嘢，好似陳奕迅、容祖兒、黃秋生、王菀之、張敬軒，不過我好怕俾人話抽水，所以就算幾friend都好，我都會問影張相貼喺店舖得唔得？老實講明星效應一定有幫助，令舖頭好快多人識。」
化妝：Wing of wingdmakeup
髮型：Ason Wong of HH salon