左丁山贊成香港多用天然氣發電，不向廣東南方電網買電，係出於自己嘅常識判斷，從環保、電費、供應穩定三方面考慮，向內地買電並無着數，不會好過現狀。政府雖然強調持開放立場，對方案一（買電）及方案二（本地兩電力公司多用天然氣發電，達到燃料組合嘅60%）無偏好，但睇吓黃錦星局長在三月十九日記者會上嘅發言，已不停為「聯網供電」（網對網）嘅穩定性講好說話；五月七日一個研討會上，環境局首席助理秘書長吳文傑講到天然氣價格可升可跌，香港長遠倚靠單一天然氣發電，要考慮氣從何來，強調聯網方案令燃料多樣化，增加電力穩定性。從兩位官員嘅談話，好明顯知道官府有預設立場啦，就係傾向向南方電網買三成香港所需電力。如果成為事實，內地可進一步控制香港經濟命脈；左丁山雖然唔係現時一啲所謂「本土派」（其觀點散見於蘋果評論版），亦覺得幾唔妥，因為電力工業係香港可以引以為傲嘅世界級工業，何以要自動放棄自主獨立，以後放緩發展，特登讓出三成市場俾內地公司？
至於吳文傑所言之聯網方案可令發電燃料多元化，只係語言偽術。黃錦星講到內地有核電、水電、天然氣電、煤電、柴油電，但所有電混入電網之內，就無從監察是甚麼燃料電，香港有不少人反對嘅煤電及柴油電對空氣冇好處，至於風電難言可靠，水電咯喎，最初以為乾淨，殊不知開發水電要建水壩，中國熱衷於建水壩，已知道破壞天然環境，妨礙河流正常流轉，導致下游乾涸，有知識嘅環保團體已大力反對建水壩發電，香港買水電即係罔顧內地生態環境，黃錦星於心何忍。至於核電，爭議性更大。
理工大學電機工程學系副教授鍾志勇博士係電力系統研究專家，佢在電台講，電網與電網之間，距離越遠，供應越不穩定，用架空電網過境輸電，易受颱風黑雨及其他意外影響，斷電嘅機率上升，如用地下電纜輸電，穩定性高啲，但成本大增，從廣東挖地下鋪電纜到新界，工程浩大，收地困難，隨時遇上高鐵延誤與沙中線同樣問題，風險甚高。佢話講到尾，買電不會降低本港電費，不會增加香港嘅環境得益，但會降低本港供電穩定性，都唔知為乜！向內地買電，還會產生附帶傷害，就係直接令本港電機工程師失去工作機會，令港大理大電機系畢業生少咗本港兩電嘅就業出路，令本港發電工程專才減少呀！